Мөслим-информ

Зирәк җитәкче

Миңа күп еллар Минтимер Шәймиев җитәкчелегендә эшләргә туры килде. Ул мелиорация министры вакытта мин алты ел Иске Карамалы авылындагы ПМК-13тә җитәкче булдым. Ул еллар мелиора- ция системасының текә күтәрелгән еллары булды.

Минтимер Шәриповичның оешты­ру сәләте мелиорация системасын Та­тарстанда берничә баскычка күтәрде. Төзелеш өчен кирәкле сугару техника­сын ясаучы заводлар, торба җитештерү цехлары, тимер-бетон эшләнмәләре җитештерү заводлары төзелде. Һәр рай­онда мелиорация системаларын төзүче күчмә колонналар барлыкка килде, алар көчле заманча техника белән тәэмин ителде. Авыл тормышын тирәннән аңлаган җитәкче буларак, Минтимер Шәймиев үзе үткәргән һәрбер киңәшмәдә авыллардагы хәлләр белән кызыксынды, колхозларда, районда баручы эшләрдә булышуны тәләп итте.

Ил өчен бик авыр булган 90нчы ел­ларда Минтимер Шәрипович Татар­стан Республикасы Президенты бул­ды. Мин җиде ел аның җитәкчелегендә Мөслим районы хакимияте башлыгы бу­лып эшләдем. СССР таркалды, Россиядә вәзгыять тотрыклы түгел иде. Икътиса­дый бәйләнешләр чуалып бетте, хезмәт хакы түләп булмый башлады. Өлкән буын кешеләренә пенсия дә зур тоткарлыклар белән түләнде. Шушы чорда зирәк акыл­лы Минтимер Шәрипович булмаса, Та­тарстан бүгенге дәрәҗәсенә күтәрелә алмас иде. Бөтен Россиядә таркаулык хөкем сөргән чорда ул федераль үзәк белән вәкаләтләрне үзара бүлешү турын­да шартнамә төзүгә иреште. Союзкүләм, Россиякүләм завод-фабрикаларның яшәешен үз өстенә алып, аларны тарка­лудан саклап калды. Бу аның зур җиңүе, шул ук вакытта өстенә зур җаваплылык алу да булды. Минтимер Шәрипович җитәкчелегендә тормышка ашырылган авылларны газлаштыру, шәһәрләрдә туз­ган торакны бетерү, халыкны чиста су белән тэмин итү, социаль-мәдәни объ­ектларны төзү программалары барысы да халык өчен эшләнде. Мөслим райо­ны мисалында карасак, 2001 ел башына райондагы йортларның 99 процентына газ керттек. Барлык социаль-мәдәни объ­ектларны газ белән җылытуга күчерә ал­дык. Россия буенча газлаштыру дәрәҗәсе бүгенге көндә дә 72 процент кына булуын исәпкә алсак, Татарстан халкы өчен ул елларда нинди зур социаль мәсьәлә хәл ителгәнлеген күз алдына китерү кыен булмас.

Район җитәкчесе булып эшләгән чорда миңа бик күп тапкыр рай­он мәнфәгатьләрендә Минтимер Шәриповичка мөрәҗәгать итәргә туры килде. Ул бик игътибарлы булды, урын­лы мөрәҗәгатьләрне уңай хәл итте. Гомумән алганда, Мөслимдәге һәрбер зур төзелеш Минтимер Шәрипович ярдәме белән башкарылды. Ул мелио­рация министры булып эшләгән чор­да районда буалар, сугарулы участо­клар төзелде. Министрлар Советы рәисе булганда район мәдәният йорты, рай­он шифаханәсе, икенче урта мәктәп төзелде.

Минтимер Шарипович Мөслимне бик ярата. Очрашканда үзе белән бергә эшләгән кешеләр турында сорашты­ра. Мөслим һәм аның кешеләре берен­че Президентыбыз күңелендә якты истәлекләр калдырган.

1998 елда Минтимер Шәймиевне Мөслим Сабантуена чакырдык. Минти­мер Шәрипович Сабантуй мәйданында бик күп танышлары белән күреште. Бәйрәмнән соң тормыш иптәше Сәкинә ханым белән яшь чакта йөргән Мөслим урамнарын урап, үзләре яшәгән йорт­та булып, истәлекләре белән уртаклаш­ты. РТСта эшләгәндә катлаулы фрезер­лы станокта бергәләп беренче шестер­няны кырган Галиәскәр абый Вәлитов, Казаннан кайтучы яшь гаиләне Яр Чал­лы пристанендә каршы алып, мотоцикл белән Пучы аша Мөслимгә алып кайткан Дофак Фәттахов белән очрашу да Мин­тимер Шәймиевнең күңелендә матур истәлекләрне яңартты.

Рөстәм Шәрипов.

Иң мөһим һәм кызыклы язмаларны Татмедиа Telegram-каналында укыгыз


Нравится
Поделиться:
Реклама
Комментарии (0)
Осталось символов: