Рамазан аенда ураза тоту - һәр мөселманның изге бурычы. Ураза гарәпчәдән "тыелу" дип тәрҗемә ителә һәм таң атудан алып кояш батканчыга кадәр ашау-эчүдән һәм уразаны бозучы барлык гамәлләрдән тыелуны үз эченә ала. Рамазан уңаеннан без райондашларыбызның фикерләре белән кызыксындык.
Роза апа, 69 яшь:
Моңа кадәр Аллаһының ризалыгы өчен ураза тотып килдем. Ныклап авырый башлагач, тота алмый башладым. Чөнки көндез дә, кич тә дару эчеп торырга кирәк. Авыру икәнеңне белә торып ураза тоту үз-үзеңә кул салуга тиң, ә бу - зур гөнаһ. Шуңа күрә, кызганычка каршы, быел ураза тотмыйм.
Регина, 34 яшь:
Дин тарафдарларының: "Уразаны көтеп алам һәм күңелсезләнеп озатам" диюләрен аңлап бетерми идем. Бүген мин дә шушы халәттә. Ураза тоту күңелгә үзгә бер рәхәтлек бирә. Ниндидер икенче бер дөньяда, башка үлчәнештә яши башлыйсың. Ураза тоту ризыкның гына түгел, ә тормышның да тәмен, кадерен белергә өйрәтә. Ураза ул - Аллаһка якынаю. Рамазан аенда дөнья нурга күмелә кебек.
Эльдар, 27 яшь:
Ураза ул - ихтыяр көчен сынау. Ураза вакытында ашау-эчүдән, фани дөнья ләззәтләреннән тыелып торып, үз-үзеңне тәрбиялисең. Ураза тотуның беренче көннәре генә авыргарак туры килә, йокы, ашау вакытын яңа графикка көйләү кыенрак. Ә бер өйрәнгәч, авырлыгы сизелми. Аллаһы Тәгалә үзе ярдәмен бирә.
Булат, 24 яшь:
Урау юллар аша булса да, шөкер, бүген дин юлына бастым. Биш вакыт намазны калдырмый, укып барырга тырышам. Рамазан аен да көтеп алам. Ураза тоту ул - һәр мөселманның изге бурычы, дип саныйм. Аны сынау дип тә атарга була. Ураза тотканда күңел дә, организм да чистара, кеше гөнаһларыннан арына.
Сораштыруны Римма Афзалова һәм Ләйсән Сабирова үткәрде.
