Тирә-яныбызда матурлык тудыручылар аз түгел. Алар арасында Мөслимдә гомер итүче Митальда Апсаттарова да бар. Минзәлә районы Чупай авылы кызы кечкенәдән матурлыкка гашыйк була.
Сабый чактан ук үргән тәкыялары, ясаган чәчәк бәйләмнәре күз явын алырлык иде, ди аның турында яшьлек дуслары. Митальда апа Кооператив ур, 170Б йортында гомер итә. Үзе яшәгән йорт территориясен гөл-чәчәккә күмгән райондашыбыз әлеге гүзәллекне үз куллары белән тудырган. Шушы йортка күчкәннән бирле(10 ел!) күпфатирлы өч катлы йотта яшәүчеләр көн дә чәчәкләр патшалыгы белән очраша дисәк тә, ялгыш булмас. Узган ел үз акчасына кое да куйдырган. 155 машина көпчәгендә әллә нинди төрдәге чәчәкләр үсеп утыра. Бу җәйдә һәвәскәр чәчкәче территориягә агач бүкәннәре дә алып кайтты. Аларның өсләренә иске башмаклар куеп буяган да, эчләренә дә чәчәкләр утырткан. Йорт территориясендәге барлык чәчәкләргә су сибәр өчен көненә бер мең литр су китә.
Митальда Апсаттарова озак еллар Мөслим авыл җирлеге Башкарма комитеты, районның авыл хуҗалыгы һәм азык-төлек идарәсе, район финанс-бюджет палатасы, район мәгариф идарәсендә техник хезмәткәр булып эшләде. Ул эшләгән чорда әлеге оешма территорияләре шау чәчәктә утырды.
Күңеле белән матурлыкка тартылган, гүзәллеккә омтылган Митальда апаның хезмәтен батырлыкка тиңләсәң дә ялгыш булмас.
Лилия Шәймиева.
Иң мөһим һәм кызыклы язмаларны Татмедиа Telegram-каналында укыгыз
