Мөслим-информ

Халык санын алу башлана

Бөтенроссия халык санын алу 2021нче елның 15 октябреннән 14 ноябрьгә кадәр барачак. Әлеге кампаниянең мөһимлеген һәркем аңласын иде.

 

Авыл хуҗалыгын кече исәпкә алу төгәлләнергә өлгермәде, халык са­нын алу башлана. Яр Чал­лы дәүләт статистика бүлегенең Мөслим райо­нындагы әйдәүче белгеч- эксперты Нурия Насыйро­ва белән әңгәмәбез халык санын алуның тәртибе һәм үзенчәлекләре турында бу­лыр.

– Нурия Назыймовна, җәй ахырында авыл хуҗалыгын кече исәпкә алу оешты­рылды. Ул ничек үтте? Нәтиҗәләр билгелеме инде?

– Авыл хуҗалыгын кече исәпкә алу Рәсәй күләмендә оештырылды һәм 29 июльдән 30 августка кадәр дәвам итте. Кече исәп (микропе­репись) төп күрсәткечләрне чикле күләмдә җыюны күздә тота. Быел исәпкә алу электрон форматта башка­рылды. Исәпкә алучылар мәгълүматларны планшет­та махсус программага керт­те, аннан информация Рос­стат мәгълүмат базасына күчерелде. Мәгълүматлар фаш ителми, алар бары тик статистика максатларында гына файдаланылачак.

Иң элек Мөслим районы территориясен исәпкә алу­ны районлаштыру эше баш­карылды, исәпкә алу участо­кларына бүлү, санаучы пер­соналга ихтыяҗ тикшерел­де. Авыл хуҗалыгын кече исәпкә алу участогына ва­кытлыча эшкә өч инструк­тор, уналты санаучы алынды. Алар төрле hөнәр ияләре ара­сыннан сайланды һәм укы­тылды. Мөслим районын­да 8007 объект кече исәпкә алынды. Шулардан: дүртесе – авыл хуҗалыгы оешмасы, 77 крестьян-фермер хуҗалыгы һәм шәхси эшмәкәр, 7926 шәхси хуҗалык. Фермер хуҗалыклары электрон исәпкә алу системасын­да санау үттеләр, ә шәхси җуҗалыкларны переписчи­клар хуҗалыкларда йөреп са­нады.

– Исәпкә алу барышын­да нинди кызыклы фактлар ачыкланды?

– Биш ел эчендә шәхси хуҗалыкларда маллар саны кимегән һәм бу тенденция дәвам итә. Кошчылык белән шөгыльләнүчеләр арткан. Шәхси хуҗалыкларында яшелчә, җиләк-җимеш үстерүчеләр экзотик үсемлекләргә өстенлек бирә башлаган. Әстерхан чикләвеге, миндаль, киви, абрикос үстерүче район­дашларыбыз бар. 16 кило­граммлы карбыз, 8 кило­граммлы кавын үстерүчеләр булган. Райондашлары­быз виноградның күптөрле сортларын үстерәләр. 2016 елдагы исәпкә алу белән чагыштырганда, шәхси хуҗалыкларда газон һәм де­коратив үсемлекләр шактый мәйданны алып тора.

– Нурия Назыймовна, Бөтенроссия халык санын алу кайчан башлана һәм ни­чек башкарылачак?

– Бөтенроссия халык са­нын алу 2021нче елның 15 октябреннән 14 ноябрьгә кадәр барачак. Халык санын алу аның демографик, икъти­сади һәм социаль характери­стикаларын ачыклау макса­тыннан үткәрелә. Ул өч төрле ысул белән башкарыла: дәүләт хезмәтләре порталы аша, пе­реписчиклар ярдәме белән һәм исәпкә алуны стационар участокта үтү мөмкинлеге дә тудырыла. Респондент үзенә уңайлы ысулны сайлый. Һәр ысулда да сораулар, таләпләр бер.

Мөслим районы алты уча­стокка бүленде. Участокларда 6 контролер, 35 переписчик, 1 инструктор һәм 1 вәкаләтле вәкил эшләячәк. 1 исәп алу­чыга якынча 550 респондент туры килә.

– Көндез күпчелек – эштә. Кайберәүләр, өйдә булып та, капкалары бикле булырга мөмкин. Халык белән очра­шу кыенлыклар тудырмас­мы?

– Халык белән аралашу өчен переписчикларга, ре­спондентлар эштән кайт­кач, кич, кайвакыт төнлә дә йөрергә туры киләчәк. Шуңа күрә, иминлекне тәэмин итү өчен, урамнарның яктыр­тылуы әһәмиятле. Төрле статустагы гаиләләр бар. Тәртипсез тормыш алып ба­ручылар, төрле авырулар белән очрашырга туры килә. Алда торган бурычларны авырлыкларсыз хәл итәрбез, дип өметләнәм. Райондашла­рыбыз исәпкә алучыларны ачык йөз белән каршы алыр­лар дип ышанам. Тагын бер үтенечем бар: шәхси ихата­ларда яшәүчеләр этләрен бәйдән ычкындырмасынар иде.

Римма Афзалова.

Иң мөһим һәм кызыклы язмаларны Татмедиа Telegram-каналында укыгыз


Нравится
Поделиться:
Реклама
Реклама
Комментарии (0)
Осталось символов: