Мөслим-информ

Мөслимдә Җәмигъ мәчетенә нигез салынды

Бүген Мөслимгә мәртәбәле кунаклар - Татарстан Җөмһүрияте Диния нәзарәте рәисе һәм мөфти урынбасары Рөстәм хәзрәт Хәйруллин, Госман хәзрәт Исхакый, күрше-тирә район һәм шәһәрләрнең мөхтәсибләре килде. Район башлыгы Рамил Муллин кунакларны Мөслимнең яңарган, реконструкция кичергән һәм яңа сафка баскан объектлары белән таныштырып йөрде.

Соңгы елларда социаль-көнкүреш объектлары, мәктәпләр, балалар бакчалары, спорт корылмалары төзү һәм реконструкция үткәрүгә зур әһәмият бирелә. Дөньяви белем бирүнең сыйфатын яхшырту, физик сәламәтлекне ныгыту юнәлешендә күп эшләнә. Бер үк вакытта халыкның рухи тормышы да игътибар үзәгендә. Республикада, шул исәптән Мөслимебездә дә, бер-бер артлы калкып чыккан мәчет-мәдрәсәләр, ислам диненең куатләнә баруы, хак дингә тартылучыларның артуы шул хакта сөйли. Нәкъ менә мөселман кардәшләребезнең артуы Мөслимдә тагын бер Аллаһ йорты төзелешен башлау ихтыяҗын тудырды. Изге җомга көнне район үзәгендәге "Яшьлек" спорткомплексы янындагы мәйданда яңа мәчеткә нигез салу тантанасы булды. Төркиядән килгән дин кардәшебез - коръән-хафиз Рөстәм хәзрәт Тәэмис чараны Коръән сүрәсе белән башлап, изге эшкә фатиха бирде. Район башлыгы Рамил Муллин халыкның тормыш-көнкүреш хәлен яхшырту белән бергә рухи яңарышка омтылуның да мөһимлеген ассызыклады. "Яңа мәчетне дин кардәшләребез белән берлектә күтәрсәк иде" дигән теләген җиткерде.

Изге җомга көнне бердәм тәкъбир әйтеп, Җәмигъ мәчетенә нигез салынды. Аллаһ йортын салу өчен һәркем кулыннан килгән кадәр сәдака да бирде. Булачак мәчетнең имам-хатыйбы да билгеле. Ул - чыгышы белән Башкортостаннан булган дин кардәшебез Заһит хәзрәт.

Нравится
Поделиться:
Реклама
Реклама
Комментарии (0)
Осталось символов: